Акашка
Акашка – ртче вылэм азьло кык нунал ӵоже. Нырысетӥ нуналэз – Быдӟым нуналэ (арнянуналэ), кыкетӥез – вордӥськонэ.
Нырысетӥ нуналаз бӧлякен вӧсьнерге ветло вылэм. Локальной вӧсяськон инты та нуналэ луэ котькуд семьялэн аслаз юртъер котыраз, малы ке шуоно нырысь семья ас понназ вӧсяське вылэм: семьяысь мӧйы воргорон, тусьтые куинь табань поныса но кусказ кускерттон керттыса, гидкуазе вӧсяськын потэ вылэм. Воргорон пырем бере, со табаньёс вылэ нылкышно нош ик табань тыре, со вылэ курегпуз табань, собере – нянь вылаз ик пӧзьтэм курегпуз.
Камит бӧляк вӧсьнерге ветлэ
Лымшор бере гурт калык аслаз бӧлякеныз вӧсьнерге ветлэ – аслад агай-вынъёсыныд коркась корка ветлон. Коркан бӧлякысь ваньмыз люкаськем бере, воргорон ӝук вӧся, радлыкез вылӥын гожтэм табань вӧсянлы тупа. Со корка пырыку, ваньмыз султыны кулэ, вӧсясь, ӝукез ӝӧк вылэ пуктыса, шӧмъя, со сьӧры семьяез но. Тазьы вӧсясько котькуд бӧлякысь коркан, кырӟало вӧсь гур.
Быдэ вуэм нылъёс гурт
Акашка возь вылын быдэ вуэм нылъёсын но пиосын ӝук позьтон
Вӧсьнерге ветлонлэн валтӥсь кулэлыкез – коммуникативной функция, малы ке шуоно бӧлякысь адямиос ог-огенызы кенешо, верасько, шулдыръясько, куд-ог югдуръёсты радъяло.
Кыкетӥ нуналаз ортче вылэм Акашка юон: Шыддоры ветлон (ог-огед доры куное) нылъёслэсь быдэ вуонзэс пусъён но Акашкае вӧсяськон.
Быдэ вуэм нылъёс, вазь ӵукна ик султыса, пото гуртэтӥ «кураськыны». Гурт кузя ветлонлэн вань аслаз радлыкез. Соос дӥсяло, удмурт дэрем, со вылэ камзол, айшет, чыртыазы ошо уксётӥрлык, со вылэ бутьмар, йыразы кертто кышет. Азьло дыре ветло вылэм гурттӥ дӧдьыен кыткем валэн, кырӟаса но ведраосазы кеньыр, вӧй (парсь но скал вӧй нимаз), курегпуз, сӥль бичаса гуртысь котькуд юрттӥ. Юртысь потыкузы, шуо: «Тау, ӝыт ӝук сиыны лыктэ!». Быдэс гуртэз озьы котыртэмзы бере, нылъёс но соослы юрттӥсь пиос (кинъёслэсь туэ быдэ вуэмзэс пусйизы) Акашка возь вылэ ӝук пӧзьтыны мыно. Калык верамъя, гурттӥ ветлон сям герӟаськемын тани маин: быдэ вуэм нылъёс, пе, асьсэды но асьсэлэсь быгатлыкъёссэс мед возьматозы гурт-калыклы.
Гурт калык лымшор бере кутске ветлыны Шыддоры. Ветло вылэм куное кадь. Шыддоры бӧлякен уг ветло, кин кинэн умой кусыпъёс возе – соин ветлэ.
Ӝыт ваньмыз люкаське Акашка вӧзь вылэ вӧсяськыны но нылъёслэсь быдэ вуэмзэс пусйыны. Гурт калык люкаськем бере, ваньмыз султо вӧсяськыны: нырысь радэ султо быдӟым куала выжыысь куинь вӧсясьёс, соос бере – нылъёс (котькудзы ик киязы ӝукен тусьты кутыса), собере кӧня ке вамыш кельтыса – воргоронъёс, воргоронъёс бере – нылкышноос. Вӧсясьёс вӧсяло ӝукез, люгезез, Инмарлы вазиськыса, быдэ вуэм нылъёслы куро шудбур, тазалык, азинлык. Со сяна, Инмарлэсь курисько тулыс бусы ужъёсыз мытыны, азьланьтыны но быдэстыны. Котькуд куриськонлы быдэ ваньмыз люкаськемъёс пӧлысь, тау карыса, йыбырттэ. Тазьы вӧсяськем бере, быдэ вуэм пиос люкыло тусьтыосы ӝук. Ваньмыз ӝук сиён вакытэ, быдэ вуэм нылъёс ветло на аракы сектаса.
Пусйыны кулэ, Акашкаысь вӧсяськон радлыкез кӧня ке воштӥськемын ини, али но азьло дырен ӵошатыса: азьло, пе, ӝукез, киязы кутыса, вӧсяло вал вӧсясьёс гинэ, нош али котькуд пинал ныл, кудӥз та арын быдэ вуэмзэ пусъе, ачиз кияз тусьты кутыса сылэ. Вӧсясьёс верало, соос но асьсэ киын мед ӝуксэс вӧсялозы шуыса.
Н. Анисимовен но Е. Тулузэн лэсьтэм фильм. Акашка но Эрукарон, 2017
А. Линтропен лэсьтэм фильм. Акашка но Эрукарон, 1993
