Гершыд вӧсяськон

Гершыд вӧсяськон циклэ пыре «кунян кенерын» вӧсяськон. Вӧсясько татын таӵе инмаръёслы: Му-Кылчинлы, Инмарлы, Акташлы. Лымшор котырын гурт калык татчы вайыны кутске нӧкы вӧй, нянь яке куарнянь но кеньыр (йыбырттон нуналэ кеньыр уг нуо) – ваньзэ тае, пу тусьтые поныса, кертто тӧдьы етӥн ӵушконэ.

Татын нырысетӥ нуналаз вандо но вӧсяло вылэм толэс но куать ӟазег, вӧйын нянь. Вӧсясьёс но соослэн юрттӥсьёссы пӧзьто вылэм толэсэз уйбыт быдӟымесь пуртыосын. Аръёс ортчемъя, толэс но ӟазегъёс интые кутскиллям вӧсяны тӧдьы ыжез, кудӥзлэн сӥльызлэсь со нуналэ ик пӧзьто вылэм ӝук. Пудо-животлэсь лыоссэ, тылобурдоослэсь тылыоссэ, вӧйын нянез, пӧзьтэм ӝукез тыласькеме куяллям, отчы ик кисьто вылэм пудо-животлэсь но тылобурдоослэсь вирзэс но. Малпаллям, курбон (солэн лулыз) ӵынэн ӵош инбамозь, Инмар дорозь вуоз шуыса.

«Кунян кенерын» вӧсяськонлэн кыкетӥ нуналаз азланьтӥське на Инмарлы вӧсяськон ик. Азьло та нунал лыдъяське вылэм нырысетӥезлэн вӧсяськон нуналлэн азланьтӥськонэз кадь, ортчытон радызъя но сыӵе ик вылэм – вӧсяло вылэм уйбыт пӧзьтэм толэсэз (ар ортчемъя – ыжез), тылобурдоосыз, вӧйын нянез но ӝукез.

Али дыре та вӧсяськонэз ортчыто ке но, нокыӵе пудо-живот но тылобурдо уг ни вандо. Вӧсясьёс асьсэ понназы вӧсяло но тылато гурт калыклэсь ваем вӧйын няньзэ.

Куинетӥ нуналэз вӧсяськонлэн сӥземын Му-Кылчинлы - ӟеч емыш но ю-нянь удалтонэз-вордонэз чаклась инмарлы. Та вӧсяськонлэн радлыкез туннэ нуналлы кылемын сыӵе ик, кызьы вал азьло дыръёсы. Висъяське курбонэныз гинэ: азьло вӧсяны вандо вылэм сьӧд ош, нош али – сьӧд ыж. Курбон воштэмез валэктыны луоз, дыр, тазьы: ош – туала вакытэ, нырысь ик, дуно пудо-живот, собере – сое вандыны кулэ трос кужым, нош вӧсяськонэ сомында калык уг ни ветлы. Пудо-животлэсь лызэ, вирзэ, куаз биньыса, гуало тыласькем вӧзы музъеме. Та нуналэ пӧзьтэм ӝукез яра сиыны Ваклед-Бодья гутын улӥсь калыклы гинэ, малы ке шуоно Му-Кылчин та гуртлэсь гинэ музъемъёссэ утись Инмар луэ. 

Озьы ик Му-Кылчинлы вӧсяськон нуналэ, вӧсяськон «ӝӧк» вылэ нянь пуктэм бере, уг ни яра йӧтылыны музъемез (гырыны, кизьыны, уриськыны но мукет). Шуо, музъем кузёлы, пе, та нуналэ шутэтскыны сётоно [Инф. 6].

Му-Кылчинлы вӧсяськон

«Ӝӧк» вылэ пуктэм нянь но вӧйНьылетӥ нуналаз вӧсясько Инмарлы, та нунал Йыбырттон («Поклонение») шуыса нимаське. Йыбырттон гершыд вӧсяськонын одӥгез сӥлы кароно вӧсь.

Та нуналлэн радлыкез но возетъёсыз, азьло дырен ӵошатыса, зол уг висъясько. Азьло вӧсяны вандо вылэм чуньы но кык ӟазег. Со ӟазегез нимало «чуньы сермет» шуыса. Ӟазегез вандон сям-йылол герӟаськемын тани маин: со, пе, курбонэз Инмар дорозь вуттэ. Туннэ нуналлы вӧсяло тӧдьы ыж выжы но одӥг ӟазег (вань ке). Вӧсясьёс, Инмарлы куриськон кылъёс вераса, вӧсяло йыбырттон нуналэ вӧен нянь, куарнянь, сӥль но лым, собере одӥгез вӧсясь пичиен куя соосты тыласькеме. 

Собере «люгезь вӧсян» ортче. Вӧсясь дэра ӵушкон вылэ тырем уксёез вӧся, собере, лыктэм калык пала берыктӥськыса шуэ: «Сётэм уксёды сюэн-сюрсэн мед берыктӥськоз», калык ог ымысь солы вазе: «Вӧсям вӧсед кабыл мед луоз». Собере ваньмыз, семьяосын пуксьыса, лым сиё. Сиськем бере тросэз кошко ни, нош котькуд семьяысь одӥг ке но адями «йыбырттыны» кыльыны кулэ. Нянен куарнянез «ӝӧк» вылысь басьтыса, вӧсясьёс но кылем муртъёсын ӵош пыдесъяськыса «йыбыртто» азьло нуналъёсы вӧсяськем интыосын. Йыбыртто татын инмаръёслы но сопал дуннесь ӵыжы-выжыослы, ӟеч улон сётэмзы понна.

Лымшор бере вӧсясьёлэн "вылэ мычем" поныны кенешемзы

Вӧсяськон тусьтыосы тырем вӧен нянь но куарнянь

Люгезь понон

Вӧсяськон

Пидесъяськыса йыбырттон

Витетӥ нуналыз вӧсяськонлэн сӥземын Акташлы. Та нуналэ гурт калык татчы вае, тӧдьы дэра ӵушконэ бинялтыса, куарнянь но кеньыр. Вандо сьӧд тусо ыж выжы. Йырзэ но пыдъёссэ ыжлэсь пӧзьто сӥлен ӵош, собере сое поно вылэ мычонэ. Озьы ик вылэ мычонэ понӥське мусур, вӧзаз пукто сюсьтыл. Собере пӧзьтэм сӥлез лы бордысьтыз люкыло, лызэ тылало. Сӥльзэ, куарняне бинялтыса, гурт калыклы люкыло, котькудӥз ачиз кутыса куарнянен сӥлез, пыдесъяськыса, вӧсясь сьӧры вӧсяське. Вераны кулэ на, кинлэн ке бӧляказ берло дыре кин ке кулӥз ке, соос султыса вӧсясько

Вӧсясь сьӧры котькудӥз, аслыз кияз куарнянь кутыса, вӧсяське


Акташлы "выле мычем"

Вӧсясьёс «вылэ мычеме» сюсьтыл пукто

Лев Вахитовлэн Гершыд вӧсяськон сярысь "Века и вехи" фильмез

Лебедева С.Х., Данилова С.Н. "Обрядовая жизнь удмуртов деревни Варклет-Бодья по материалам этнографических экспедиций" 

Владыкин В.Е. Религиозно-мифологическая картина мира удмуртов