Гершыд циклэ пыре кык куяськон.
Пересьёс шуо вылэм: «Вӧсяськын кутскыны уг яра, кулэмъёсты тодэ вайытэк». Соин ик ю-вӧсь бере нырысь сопал дуннеысь ӵыжы-выжыослы куясько, собере гинэ кутско Гершыд вӧсяськон циклэз. Гурт калык люкаське куяськон интые, кудӥз интыяськемын гурт пумысь шур улалльын. Сьӧразы басьто нянь, курегпуз, аракы но мукет сиён-юон. Ваньмыз ӵош куясько сопал дуннеысь вашкалаослы.
Акташ вӧсяськонлэн ӵуказе нуналаз ортчыто сьӧрло бырем адямиослы куяськон (войнае, сюрес вылэ но мукет). Гурт калык татчы вайыны быгатэ котькыӵе ик сиён-юон, со сяна пӧзьто кунян сӥлен ӝук, кудъёссэ куяло пересь кызъёс выжые.
