Вöсяськон арама. Удмурт гуртлэн одӥгез сакральной интыез. Адӟымтэез но мурт/тодмотэм шуэмез возьматӥсь символ, озьы ик кышкытлыкез возьматӥсь инты.
Татын арлы одӥг пол, Пукрол уе, воргоронъёс ӝытысен уйёзь вöсясько вылэм. Вöсяськонни интыяське вылэм нюлэскын котыртэм интыын, кытчы ветлыны быгато вылэм йылолэз ортчытон дыръя гинэ.
Пырисько татчы, кызьы верамы ни вал, воргоронъёс гинэ, нылкышноослы ветлыны та интые лэземын ӧвӧл. Вӧсясьёс луыны кулэ Луд выжыысь. Луд вӧсяськон инты котыртэмын вылэм кык полэс: огез – бадӟым, мукетыз – пичигес. Со котыртэмъёс пушкын «урод» (лек) Лудлэн юн но зол кужымез вылэм, шуо. Нырысетӥ котыртэмаз сьӧд такалэсь ӝук пӧзьто вылэм, отын ик вӧсясько. Кыкетӥ котыртэмаз яра вылэм пыраны вӧсясьёслы гинэ, вылэ мычонэз писпу вай борды пуктыны но сое отысь басьтыны гинэ. Вазиськылӥллям та вӧсяськонын нырысь ик Лудлы, собере Инмарлы но Му-Кылчинлы.
Курбонэз лыдэ ке басьтоно, со герӟаськемын вӧсьлэн «лек» луэменыз, соин ик солы сӥзё сьӧд такаез, кудӥз возьматэ кужымез, улон сётӥсез. Со сяна, така сярысь куд-ог калыкъёслэн вань теоризы, солэн шундыен но герӟетэз вань шуыса. 1960-1970-тӥ аръёсы Луд выжыысь вӧсясьёс быремен, та вӧсяськон сям-йылол но быремын вал.
